Dende o Grupo Municipal do PP, queremos reiterar as nosas condolencias á familia da alcaldesa falecida, aos nosos compañeiros de corporación e de partido e a toda a veciñanza que sentiu a súa perda.
Unha vez avaliado o novo contexto que, desgraciadamente, se ten producido, o Grupo Municipal do Partido Popular decidiu esta mañá renunciar a presentar iniciativas para as comisións e pleno deste mes de marzo co obxectivo de facilitar a reorganización do goberno local tralo falecemento da alcaldesa.
Somos conscientes de que esta é unha situación excepcional e imprevisible, diante da cal queremos actuar por riba de todo dende a empatía persoal e a responsabilidade institucional. Froito diso, é o noso compromiso colaborar en que o Concello poida reestruturarse nun momento tan complexo.
Isto non significa en ningún caso unha paralización do noso labor como principal grupo da oposición. Seguiremos traballando con compromiso e dedicación polos veciños e defendendo as nosas propostas, pero entendemos que, nun contexto como este, o prioritario é que o Concello poida recuperar a súa normalidade canto antes.
