O Grupo Municipal do Partido Popular de Lugo reclama ao goberno local que acelere os trámites necesarios para facer efectiva a permuta dos terreos do Castiñeiro, acordada hai case dous anos. O intercambio de terreos desbloquearía a situación da parcela na que inicialmente se proxectaban vivendas públicas e permitiría desenvolver novas dotacións para o barrio
Mar Carballas, lembrou que o acordo xurdiu tralas demandas da veciñanza do Castiñeiro, que reclamaba máis servizos para a súa zona. A popular lamenta que, a estas alturas, sigamos agardando por esta permuta recriminándolle á alcaldesa que en varias ocasións, a última en decembro durante o debate do estado da cidade, asegurase que esta operación sería INMINENTE.
O Partido Popular subliña a importancia de dotar ao Castiñeiro de servizos que melloren a calidade de vida dos seus residentes “pedimos xestión e axilidade. Non podemos permitir que un acordo tan importante para o barrio quede no esquecemento”, afirmou a concelleira popular.
