El portavoz popular critica que “ante la nueva situación que se puede generar en relación al Plan General, la alcaldesa esté más pendiente de nombrar un Director de Personal que de atender un tema gravísimo que nos afecta a todos os lucenses”
O voceiro do Grupo Municipal do Partido Popular, Jaime Castiñeira, esixiu esta mañá en rolda de prensa á alcaldesa que “dea a cara e diga que pensa facer” co Plan Xeral de Ordenación Municipal, logo da “certa alarma social” xerada tras a sentenza de Vigo.
“Estamos diante dun tema gravísimo, que afecta a todos os lucenses e dende hai catro días a alcaldesa non abriu a boca ao respecto”, reflexionou o voceiro popular, ao tempo que destacou que “hai unha ameaza sobre o Plan Xeral e nin sequera se lle ocorreu saír a defender un documento vital ao municipio”. “Non se pode entender por que se agocha a alcaldesa, que está máis preocupada polo nomeamento dun Director Xeral de Persoal que por avaliar o que pode ocorrer co PXOM”, ao tempo que ironizou con que “ao mellor en vez dese director xeral que xa deben de ter medio negociado entre Lugonovo e o PSOE, o que habería é que nomear un director xeral que substitúa á alcaldesa”
Proposición plenaria.-
Durante a súa comparecencia, o popular anunciou que pedirá no vindeiro pleno a convocatoria urxente da Comisión de Planeamento para “analizar a nova situación xerada tras a sentenza de Vigo”, así como do Consello Económico e Social “co obxecto de ditaminar os pasos a dar”. “É neses foros onde temos que avaliar a conveniencia de iniciar a revisión inmediata do Plan Xeral, a súa adaptación ás novas leis ou a contratación dos estudos de inundabilidade que faltan”, indicou. “A xustiza ten os seus camiños e os seus tempos e o Concello os seus”, explicou Castiñeira, ao tempo que advertiu que “volver ao PXOM de 1990 sería un desastre, máis aínda tendo en conta que non é un documento inamovible”, porque “dentro de tres ou catro anos non podemos estar facendo cidade cun modelo de hai 30 anos”. “Aproveitemos a fortaleza de que temos un tempo de marxe, a diferenza de Vigo”, matizou o popular.
Por outra banda, Castiñeira desbotou a petición de paralización do actual PXOM “porque sería unha irresponsabilidade gravísima que suporía a paralización total do municipio e poría en perigo a dinamización económica e o mantemento e creación de emprego en Lugo”. Nese senso, o popular quixo trasladar unha mensaxe de prudencia e tranquilidade porque, “se ben estamos diante dunha ameaza real”, “o PXOM de Lugo segue en vigor e non está anulado, polo menos ata que haxa unha sentenza”. Así mesmo, Castiñeira indicou que “atender á paralización implicaría poñer en risco o novo colexio do Sagrado Corazón e iniciativas como a rehabilitación integral dos barrios de A Milagrosa ou A Ponte ou o desenvolvemento dos urbanizables do entorno do HULA.
Por último, indicou que “canto máis tarde o goberno municipal en aprobar o 5% pendente, máis en risco pode estar todo o documento”. Nesa liña, detallou que “coa demora de cinco anos en rematar ese proceso e coa actitude obstaculizadora tanto do goberno anterior como do actual, dificilmente se pode xustificar a excepcionalidade de non ter sometido o PXOM lugués á Avaliación Ambiental Estratéxica” que concedeu o 16 de abril de 2009 a Xunta “estando o goberno bipartito en funcións, xusto dous días antes da toma de posesión de Feijoo”. “Unha excepcionalidade que era para gañar tempo e aquí fíxose todo o contrario”, concluíu.
