El portavoz del PP, Jaime Castiñeira, afirma que “igual que la ORA fue fuente de corrupción en los gobiernos de López Orozco, parece que la nueva alcaldesa sigue empeñada en continuar con la misma tónica, por lo que tendrá que explicar qué intereses reales la mueven”
O voceiro do Grupo Municipal do Partido Popular, Jaime Castiñeira, pregunta ao goberno municipal “por que insiste tanto en seguir deixando a ORA en mans dunha empresa privada”, en lugar de apostar por unha xestión municipal e gratuíta.
Nesa liña, Castiñeira afirma que “igual que a ORA foi fonte de corrupción durante os gobernos de López Orozco, parece que agora a nova alcaldesa segue empeñada en continuar coa mesma tónica”, ao tempo que reitera que “tanto se parecen as posturas do novo goberno ás do anterior que ata o borrador das zonas é o redactado hai anos a medias entre a empresa Vendex e Orozco”, no que pactaban a ampliación das rúas con ORA para que a empresa obtivese maior beneficio, tal como transcendeu do sumario da Operación Pokemon. Así, o voceiro dos populares no Concello de Lugo reta á nova alcaldesa a “dicir publicamente cales son os intereses reais que a moven”.
Así mesmo, Jaime Castiñeira recalca que “dende o Partido Popular non estamos dispostos a que a ORA siga sendo un mero instrumento recadatorio en mans dunha empresa que practicamente non aporta nada ás arcas municipais”, polo que defende “outra vez máis, e así o temos recollido no programa electoral co que nos presentamos en maio deste ano, a necesidade de que suprimir a actual zona azul”.
Por outra banda, o popular anima aos socialistas a “participar e traballar conxuntamente nas comisións que se teñen que crear para a modificación da ORA” e recalca que “os 17 votos da oposición suman máis que os 8 do goberno en minoría do PSOE”.
Agradecemento aos outros grupos da oposición.-
Polo demais, o voceiro popular agradece publicamente “o consenso e a boa disposición que amosaron nesta cuestión os outros catro grupos políticos da oposición”, xa que “todos xuntos demostramos que o que nos move, por riba dos intereses partidistas, son os lucenses e poder mellorar a mobilidade e o tráfico” cara a ese Lugo mellor que todos merecemos. Deste xeito, Jaime Castiñeira lamenta que “o PSOE, e especialmente a súa alcaldesa, sigan dándolle as costas a unha postura que comparten todos os grupos políticos e a maioría dos veciños”. “A ver se aproveitan a visita da corporación de Ferrol agora en San Froilán para convencerse de que hai alternativas”, apunta.
Por último, Castiñeira reitera que “a filosofía que debe rexer o estacionamento é a de garantir a rotación de vehículos, en lugar de que a ORA sexa un instrumento de recadación para unha empresa privada, que é o modelo que defendeu o PSOE de López Orozco e que é o modelo no que agora persevera o PSOE da nova alcaldesa”. “Desgraciadamente, non cambiou nada”, conclúe o popular.
