El portavoz popular Jaime Castiñeira critica que “una filial de Vendex, eje de la Operación Pokemon, lleva desde noviembre de 2014 facturando sin contrato al Ayuntamiento por la atención en los museos y sin visos de que cambie su situación”
O voceiro do Grupo Municipal do Partido Popular, Jaime Castiñeira, denuncia pagamentos sen contrato por importe duns 600.000 euros a Sermasa, filial de Vendex que se ocupa da xestión dos museos municipais e a información turística.
Jaime Castiñeira considera “inxustificable e inxustificado” que esta empresa, “eixe da Operación Pokemon”, leve “beneficiándose desta situación” dende novembro de 2014, “co agravante de que é a terceira vez que ocorre neste servizo e con esta mesma empresa privada nos últimos anos”. Nesa liña, detalla que “esta situación totalmente anómala e irregular” se produciu entre xuño de 2010 e marzo de 2012, cando ingresou 280.000 euros; outros 50.000 euros na primavera de 2013; e uns 243.000 euros entre novembro de 2014 e marzo de 2016, último mes que consta abonado. “E, como non, sempre coa advertencia expresa do interventor municipal da necesidade de corrixir e mudar a situación, cos pertinentes reparos de legalidade que sistematicamente levanta a nova alcaldesa, exactamente igual que o facía o seu predecesor”, apunta o popular.
Así mesmo, o voceiro popular destaca que “á marxe do aforro económico que se obtería cunha nova licitación e do que se está a privar aos lucenses, debería existir tamén unha mínima preocupación por non seguir permitindo que unha empresa estritamente vencellada aos casos de corrupción que tanto dano lle fixo á imaxe pública do Concello e dos lugueses continúe facturando tan impunemente”.
Por último, Jaime Castiñeira salienta que “a ninguén se lle escapa que esta situación, da que se beneficia claramente a filial de Vendex, é moi similar á da empresa da ORA, á que os gobernos socialistas lle permitiron continuar explotando a zona azul da cidade durante catro anos máis malia á sentenza xudicial que anulaba o contrato polas irregularidades que se cometeran no procedemento de adxudicación”.
