Jaime Castiñeira afirma que “los estudios técnicos avalan la propuesta que tantas veces hemos planteado desde el Grupo Municipal del PP de que la zona de baño pública se sitúe frente al Pazo Universitario, en el entorno de la pasarela de Alfonso X”
O voceiro do Grupo Municipal do Partido Popular, Jaime Castiñeira, pide ao goberno local que facilite copia dos informes técnicos en relación ás posibilidades de ubicación da praia fluvial.
A este respecto, apunta que “os estudos dos expertos avalan a proposta que tantas veces temos trasladado dende o noso grupo político”, en referencia á alternativa de que a zona de baño se localice fronte ao Pazo Universitario no entorno da pasarela de Afonso X. “Temos dito moitas veces que o noso proxecto era ubicar nese entorno a dotación, apoiándonos en moitos argumentos, sobradamente coñecidos, como a existencia dunha importante zona de aparcamento nas inmediacións e dunha pasarela sobre a N-VI para a conexión coa cidade”, destaca Jaime Castiñeira.
Nesa liña, o popular subliña que “o único que nos queda é lamentar a falta de alturas e o curtopracismo do goberno”, que se nega a recoñecer a autoría da proposta, “que, por suposto, non é só do PP senón que compartimos con milleiros de lugueses que se teñen bañado nese entorno ou que simplemente aproveitan esa zona para tomar o sol”. “Aínda así, o verdadeiramente importante é que esta dotación pública vaia para diante e que non quede noutro dos anuncios incumpridos con data de caducidade”, reflexiona Jaime Castiñeira, ao tempo que incide en que “non queremos pensar que este goberno local segue sen coñecer o municipio e que non saben nin por onde andan”.
Recuperación de caneiros e adquisición de terreos.-
Paralelamente, o voceiro popular reitera a necesidade de que, en colaboración técnica e económica de organismos como a Confederación Hidrográfica Miño-Sil e a Deputación Provincial, se proceda á reparación dos tres caneiros da zona: o de Lulo, o de Carlos e o da Tolda. “Son parte esencial do noso patrimonio histórico-cultural que non podemos permitirnos perder e, dende logo, o seu estado actual de deterioro – especialmente dos dous primeiros – fai que non poidamos ter grandes expectativas de que iso non acabe ocorrendo”, advirte.
Por último, o popular insiste en que se concreten “cronogramas e orzamentos” que reflictan “que existe unha vontade política real” por adquirir os terreos situados na confluencia do Parque do Rato e o Paseo do Miño. “É unha actuación que leva pendente dende que o PSOE accedeu ao goberno local a finais do século pasado e no que, a día de hoxe, cando xa transcorreu máis dun ano e medio do novo goberno, tampouco hai novidades porque os socialistas prefiren ter continuamente remanentes de tesourería en lugar de invertir nos lugueses”, conclúe.
