Antonio Ameijide le reclama a la alcaldesa la supresión del cargo de la Dirección General de Recursos Humanos, “a la vista de que no ha resuelto ningún problema desde la creación de este puesto hace siete meses y de que ni siquiera ha participado en la redacción de la RPT”
O vicevoceiro do Grupo Municipal do Partido Popular no Concello de Lugo, Antonio Ameijide, reclámalle á alcaldesa de Lugo que estude “eliminar” o posto da Dirección Xeral de Persoal, dado que “nos sete meses que transcorreron dende a súa creación, demostrouse a ineficacia e a inutilidade dun cargo que estivo cuestionado dende o primeiro momento”.
“Sen entrar a cuestionar a profesionalidade e a valía de quen desempeña estas funcións, o certo é que a implantación deste posto directivo non solucionou ningún dos conflitos que se foron xerando nin dos que viñan herdados”, expón o popular, para quen “o máximo expoñente” disto é a situación que atravesa a Escola Municipal de Música, “no aire e á que este goberno local, con apoio desta figura, non soubo darlle unha solución, senón que, ao contrario, segue a velas vir e con novas sentenzas xudiciais en contra”. “Iso por non falar do nomeamento no seu día irregular e irresponsable do encargado de tramitar as sancións na Policía Local”, lembra.
Nese senso, o popular asegura que “o máximo responsable do desgoberno que reina nesta materia é o goberno e, máis concretamente, a alcaldesa, que é quen ten atribuídas directamente as competencias sobre os recursos humanos”. Así, Ameijide acúsaa de practicar “política ficción”, da que “a mellor mostra foi a aprobación da declaración de servizos sociais en nove áreas, que se presentou como o revulsivo para a contratación e na que non se deu nin un mínimo paso dende o acordo da Xunta de Goberno do 6 de outubro”.
Así mesmo, o vicevoceiro popular tamén alude a que “este posto tampouco se xustifica se se analiza a falta de avances na convocatoria dos postos contemplados na Oferta de Emprego Público do ano 2015 e do ano 2016 ou a inexistencia de melloras en servizos que os socialistas foron paulatinamente desmantelando”, como o de augas ou o dos electromecánicos.
Por outra banda, Antonio Ameijide ironiza co concepto de “provisionalidade” que ten o goberno socialista, que, mes tras mes, vai “blindando e consolidando unha situación que, de acordo coas súas propias verbas, non debería ser máis que transitoria”. “Pero o certo é que, unha vez máis, igual que pasou coa supresión da ORA ou con facer da Ronda da Muralla zona 30, os feitos e a realidade volven desmentir ao goberno”, sentencia.
Por último, o popular alerta de que aos lugueses sáenos “moi caro” o “capricho político” de PSOE, Ciudadanos e Lugonovo de crear “un cargo que se demostrou que non era necesario”. “Lugonovo tiña neste posto a excusa perfecta para apoiarlle despois as ordenanzas fiscais de 2017 a este goberno e, coas desculpas destes días do voceiro socialista respecto da contabilidade creativa e mutante de Lugonovo, parece que tamén terá desculpa para sacarlle adiante os orzamentos municipais deste exercicio do que xa vai case un mes”, conclúe.
