Antonio Ameijide propone que se recuperen las bicicletas que ya ha adquirido el Ayuntamiento en el Rebicíclate y que, “mientras que no se recupera este programa para el conjunto de la ciudad”, se implanten puntos de préstamo a orillas del río Miño
O vicevoceiro do Grupo Municipal do Partido Popular, Antonio Ameijide, pide ao goberno municipal que habilite un sistema de préstamo municipal de bicicletas no Paseo do Miño.
Tal como explica o edil popular, “neste momento o Concello dispón de alomenos 25 vehículos deste tipo que foran adquiridos para o programa Rebicíclate que están abandonados nun almacén, sen darlles ningún uso e provocando que o paso do tempo e a falta de utilización os fagan inservibles”. “Polo tanto, a lóxica di que non ten sentido ningún ter tiradas esas bicicletas en lugar de estarlles a sacar proveito nun punto emblemático da cidade como son as beiras do río”, detalla Ameijide.
Nesa liña, o vicevoceiro popular propón aos socialistas que estuden a maneira de que “tanto lugueses como turistas teñan unha maneira máis saudable e natural de achegarse ao Miño e de desfrutar dun Paseo que lle debemos ao último alcalde popular, Joaquín García Díez”. “A todos os políticos de todas as forzas se nos enche a boca falando de potenciar o río e as zonas verdes, pero é hora de pasar das palabras aos feitos”, asevera, ao tempo que incide en que “esta medida non tería practicamente custe económico ao dispoñer das bicicletas”. “Estamos a falar de algo que é tecnicamente posible, posto que se trata dunha alternativa que xa existe en moitas outras cidades”, matiza.
“Máis preocupación da alcaldesa”.-
Por outra banda, o vicevoceiro popular, Antoino Ameijide, reclama á alcaldesa socialista que “a súa preocupación e o interese polas bicicletas vaia máis aló dun día ao ano”, en referencia á chegada hoxe da Volta Ciclista á cidade, “evento que, por suposto, apoiamos dende o Grupo Municipal do Partido Popular”.
Nese senso, Ameijide pídelle “valentía” e que “adopte medidas e decisións que sexan un verdadeiro estímulo e que supoñan un impulso real ao uso destes vehículos”, en lugar de cinguirse a “xestos de cara á galería aos que están tan acostumados nos ten”. Entre estas intervencións, o popular alude, “ademais de á recuperación do programa Rebicíclate, cuxa instalación nos custou 117.600 euros, á ampliación dos espazos de estacionamento específicos “seguros e protexidos”, á creación dun rexistro municipal de bicicletas “que dea maior seguridade aos usuarios” e a incorporación de novos treitos para a circulación de ciclos, “de xeito que cheguemos aos 47,4 quilómetros deste tipo que recomenda o Plan de Mobilidade, moi lonxe dos 4,6 quilómetros actuais”.
Por último, o vicevoceiro suxire melloras de cara á reimplantación do Rebíciclate, “que debe ser inminente”, como a gratuídade total do sistema para os veciños censados en Lugo, “aínda que cunha garantía de fianza grazas a unha tarxeta de crédito”, a ampliación do número de bases dispoñibles, “multiplicando as cinco existentes ata as 22 que recomenda o Plan de Mobilidade”, a adquisición de bicicletas eléctricas ou a instalación dun sistema de videovixiancia. “Son todas propostas sensatas e coherentes que buscan impulsar a recuperación dun programa que será o termómetro da verdadeira preocupación da alcaldesa por esta cuestión”, advirte.
