La concejala popular Ana López Pombo sugiere que el Ayuntamiento de Lugo celebre una sesión plenaria de adolescentes de institutos de la ciudad para trabajar valores de igualdad, coeducación, conciliación y corresponsabilidad
A edil Ana López Pombo, representante do Grupo Municipal do Partido Popular no Foro de Igualdade, proporá mañá neste órgano que o Concello de Lugo celebre un pleno xuvenil para concienciar nesta materia.
Nese sentido, a popular suxire que dende o Concello se convoque aos alumnos dos institutos de ensinanza secundaria do municipio de Lugo para participar dunha iniciativa na que se aborden cuestións relativas á igualdade, á coeducación, á conciliación e á corresponsabilidade. “Son eixes vectoriais dunha acción transversal da que a administración municipal se pode converter en impulsora”, detallou.
Deste xeito, López Pombo explicou que “cunha iniciativa así conséguese un traballo sostible e prolongado no tempo, no que se impliquen como actores fundamentais os propios alumnos e alumnas e tamén os docentes e as súas familias”, de xeito que “se acade unha intervención entre todos os axentes educativos, posto que a asimilación dos valores de igualdade depende, fundamentalmente, da educación”. “Partimos da premisa de que este pleno xuvenil require un traballo previo de sensibilización e intercambio de información e debate a esas tres bandas (alumnado, profesorado e familias”, detallou a popular, quen indicou que “precisamente o diálogo e a empatía, que se traballarían no ámbito desta proposta, son dous elementos esenciais para a igualdade”.
Ademais, a edil popular subliñou que “o que temos claro é que hai que realizar un traballo sen descanso entre o colectivo dos máis novos”, posto que “da súa concienciación, da súa involucración e da súa implicación depende que o día de mañá teñamos ou non unha sociedade máis igualitaria”.
Actos do Día Internacional da Muller.-
López Pombo enmarcou esta acción entre as propostas que o Grupo Municipal do Partido Popular trasladará mañá para desenvolver ao fío dos actos de conmemoración do Día Internacional da Muller o vindeiro 8 de marzo. Así mesmo, reclaman que non se politice esta celebración “porque o importante é unir esforzos para concienciar na igualdade”.
Por último, os populares reiteraron a súa queixa polo escaso tempo co que se convoca este foro para a planificación das accións que se van celebrar para conmemorar o 8 de marzo, co gallo do día da muller. “Seguramente con máis marxe poderíamos programar máis actos e ter eventos de máis tirón para darlle a visibilidade e repercusión que require a igualdade, unha materia na que nos queda moito por avanzar como sociedade”, conclúe.
