La edil popular Encarna Amigo afirma que “el gobierno local no puede, bajo ningún concepto, prolongar los incomprensibles horarios de verano, en el que la mayoría de los museos permanecieron cerrados los lunes, martes, miércoles y domingos por la tarde”
A concelleira do Grupo Municipal do Partido Popular Encarna Amigo reclama ao goberno socialista a ampliación dos “exiguos” horarios dos museos municipais.
Tal como explica a popular, “o goberno local non pode prolongar os incomprensibles tempos de apertura deste tipo de instalacións”, posto que “a maioría dos museos municipais permaneceron pechados máis da metade da semana durante todo o verán”. Nesa liña, Encarna Amigo reprocha aos socialistas que “no momento en que Lugo recibe a máis turistas, a Domus do Mitreo, a Porta Miñá e o Museo de San Roque non abriron luns, martes, mércores nin os domingos pola tarde”, o que perxudica “claramente” un maior tempo de estadía dos visitantes na cidade, do que se beneficiarían comercios e establecementos hosteleiros.
Así mesmo, a concelleira popular solicita que se completen os horarios do MIHL e a Casa dos Mosaicos, instalacións que os domingos tampouco abriron durante a mañá e a tarde, respectivamente. “Se queremos aproveitar o fluxo de turistas e visitantes que chegan á nosa cidade, cómpre establecer unha estratexia cultural integral na que o noso patrimonio museístico debe ocupar un lugar central, para o que loxicamente é fundamental que estas dependencias permanezan abertas o maior tempo posible”, subliña Amigo.
Así mesmo, a edil popular responsable de Cultura e Turismo solicita “especial atención” aos momentos nos que ao longo dos vindeiros meses se agarda unha maior chegada de turistas”. Nese senso, pide aos socialistas “horarios especiais e amplos” en períodos como o San Froilán “para evitar que, como ocorreu outros anos, estivesen pechados en plenas festas algúns destes museos”, as fins de semana e as pontes festivas “para os visitantes de proximidade”.
Modificación da ordenanza fiscal para corrixir erros.-
Por outra banda, a edil popular tamén insta ao goberno municipal a modificar as ordenanzas fiscais relacionadas con esta materia. Nese senso, cómpre indicar que a ordenanza municipal número 403, con título Prezos públicos pola prestación de servizos nas instalacións culturais, recolle no epígrafe 4 do artigo 3 as contías que deberán ser aboadas por acceso a diferentes museos (Centro de Interpretación da Muralla, Casa dos Mosaicos, Centro Arqueolóxico de San Roque e Sala de Exposicións Porta Miñá) “cando na realidade o Concello de Lugo non está a cobrar neste momento pola entrada a estes recintos”. “O certo é que na ordenanza que regula esta cuestión só se alude á gratuídade de acceso 16 días do ano (o primeiro sábado de cada mes, o Día das Letras Galegas, o Día Internacional dos Museos e o Día de Galicia), de acordo coas exencións recollidas no artigo 5.3”, lembra a edil popular.
Ante esta situación, a popular solicita que os socialistas “axusten á legalidade” esta realidade, de xeito que “ou ben os museos volven ser de pago, conforme ao establecido na ordenanza en vigor, ou ben se adapta este documento que os regula á realidade actual”. “Trátase dunha decisión política que deben adoptar os socialistas, e actuar en consonancia para corrixir esta situación anómala”, conclúe Encarna Amigo, ao tempo que anuncia que trasladará esta proposta á vindeira Comisión de Cultura, co obxectivo de que as ordenanzas fiscais de 2016 enmenden este erro.
