El portavoz popular, Jaime Castiñeira, asegura que se dispara la previsión de ingresos al tiempo que “crece descontroladamente” el gasto corriente, que se incrementó en un 20% en los últimos cinco años hasta llegar a los 43 millones
O voceiro do Partido Popular no Concello de Lugo, Jaime Castiñeira, afirmou esta mañá en rolda de prensa que o orzamento que vén de aprobar o goberno local en xunta de goberno extraordinaria é “opaco, insuficiente e incompleto”.
“Estamos diante dunha proposta que é pouco ambiciosa”, sinalou Castiñeira, quen exemplificou esta “realidade” co novo plan de emprego, para o que prevén 1,2 millóns de euros. “Toda iniciativa nesta materia é sempre benvida e contará co noso respaldo”, indicou o popular, se ben sinalou que “o noso compromiso, que seguimos mantendo, era destinar seis millóns de euros en tres liñas complementarias para a creación e o mantemento de postos de traballo”.
Por outra banda, o voceiro popular indicou que “á vista das primeiras indicacións que recibimos esta mañá no Consello Económico e Social e á espera de que nos remitan a documentación completa, vemos que se incorporaron algunhas das vellas reivindicacións que levamos tempo defendendo dende o Partido Popular”. Entre elas, citou o incremento nas partidas de axudas ao aluguer e de emerxencia social, a creación dunha praia fluvial ou a actuación integral en Duquesa de Lugo, co desdobramento, a iluminación e o carril-bici. “Como non podía ser doutra maneira, estudaremos todo o orzamento en canto o teñamos, pero as primeiras liñas reflicten que o goberno municipal atendeu parte das nosas propotas e, ante a súa falta de ideas, déixanse guiar polo Partido Popular”, subliñou Castiñeira, quen dixo que “o importante é que Lugo avance e os lugueses gañemos en calidade de vida”.
Ruptura de diálogo.-
Durante a súa comparecencia, o popular tamén desmentiu que se tivera producido unha ruptura do diálogo co goberno, xa que “non se pode romper o que non había”. Nese senso, retou á alcaldesa a dicir “un só momento no que o PP non participara nunha ronda de traballo” e criticou a “opacidade, o escurantismo e a falta de transparencia” coa que se tramitaron “para impedir que a oposición non teña dereito á información”. “Agora, ás 12 seguimos sen ter o plan de investimentos e toda a documentación”, salientou, ao tempo que incidiu en que “van na boa liña, pero tamén é certo que nos gustaría ter participado máis na elaboración do proxecto”. “Din que son uns orzamentos participativos pero aos primeiros aos que lles impiden participar é aos representantes políticos da maioría dos lucenses”, manifestou Jaime Castiñeira.
Incremento gasto corrente e ingresos.-
Por outra banda, Castiñeira insistiu en que “se segue a medrar descontroladamente” o gasto corrente improdutivo, que só dende 2011 se incrementou nun 20% ao pasar de representar 35,9 millóns de euros aos 42,9 millóns para este exercicio. Nese senso, urxiu de novo ao goberno local á elaboración dun plan de control a curto e medio prazo, “imprescindible á vista do que se está a desbordar este capítulo e da posta en funcionamento de novas dotacións que o encarecen”. Por último, o voceiro popular tamén advertiu de que a previsión de ingresos do Concello de Lugo medra, dende a anterior proposta presentada hai uns dous meses, en 1,5 millóns de euros. “Que nos expliquen por que incrementaron un 5% en dous meses a presión fiscal sobre todos os lucenses”, concluíu.
