O Grupo Popular desgranou o tipo de débedas que acumulan os lucenses que non pagan ao Concello e que corresponden aos anos 2016 e 2017. “Estamos falando de 1.150 recibos incobrables de todo tipo” explicou a concelleira popular Ana López Pombo quen destacou “os 910 recibos por un importe de case 80.000 € que corresponden á rodaxe. En segundo lugar, a unha distancia moi considerable, atopamos os 89 recibos de multas de tráfico (15.600 €) e os 13.576 € que quedaron sen cobrar en concepto de Imposto de Actividade Empresarial, ou os 12.232 € dos 88 recibos por taxa de subministro de auga. Completa a listaxe de impagos as plusvalías, IBI e vados”.
López Pombo explicou que, antes de que tesourería asine o decreto no que se recoñece que estes importes non se van cobrar, os contribuintes xa recibiron os avisos pertinentes primeiro, polo procemento ordinario, e logo por vía executiva co recargo correspondente.
Dende o Grupo Municipal do Partido Popular denuncian que a xestión da recadación por parte do goberno socialista é un despropósito e que a concelleira de economía “debería tomar decisións e adoptar medidas máis contundentes para evitar que se consolide o problema dos recibos imposibles de cobrar”.
Para López Pombo non é de recibo que a señora Prieto presuma de gran xestión en materia económica “está orgullosísima de rebaixar o período medio de pago despois de que Lugo leve tres anos sendo a cidade de Galicia que peor pagaba e estando no podium de España por este despropósito”. Debería explicar porque no que leva de mandato como responsable da área económica non tomou nin unha soa decisión para frear o incumprimento sistemático no que incurren empresas e particulares que non pagan os seus impostos en tempo e forma”.
A edil popular manifestou que en materia de recadación o único que fixo o goberno socialista de Lugo foi “desmantelar inspección tributaria para externalizar o servizo” lembrando como na actualidade esta empresa engrosa a colección de prestacións externalizadas e que presta servizo con contrato caducado.
