Os concelleiros do Grupo Municipal do PP amosaron a súa satisfacción despois de que o goberno local accedese a renovar o muro de Cidade de Viveiro con Frai Plácido Rei Lemos, un punto no que nas últimas semanas aumentaron as fendas na beirarrúa, poñendo en risco a seguridade
Os concelleiros do Grupo Municipal do Partido Popular no Concello de Lugo acadaron esta mañá en comisión o compromiso do goberno local para renovar a beirarrúa ao carón do muro da rúa Cidade de Viveiro, un punto no que a seguridade está en risco por mor dos grandes afundimentos que hai na beirarrúa.
Pese a todo, os concelleiros populares critican a pasividade do goberno local ante esta situación, que segue sen encargar un estudo sobre a estabilidade deste muro, asegurando que “unicamente fan vixilancia”.
Aínda así, dende o goberno local comprometeron o arranxo da rúa e un estudo na mesma para atopar as causas destes afundimentos que, dende o goberno local, aseguran que non se deben ao aumento do tráfico, pese a que tampouco teñen un estudo que confirme este extremo. “A realidade é que nos últimos meses aumentou a circulación nestas rúas polos cambios no tráfico, pero o goberno local non ten ningún estudo para argumentar as súas declaracións nin para saber se estas rúas están capacitadas para absorber tantos vehículos”, apuntan.
