Antonio Ameijide critica a Lara Méndez polo nulo mantemento realizado nesta infraestrutura que a día de hoxe segue no limbo, xa que nin Concello de Lugo nin o Ministerio de Transporte, Mobilidade e Axenda Urbana (antes coñecido como Fomento) fanse responsables das tarefas de mantemento e arranxo
O nulo mantemento que desde o Concello de Lugo (PSOE e BNG) se realiza das diferentes infraestruturas municipais queda demostrado unha vez máis cos problemas que estes días apareceron na Ponte Branca sobre o Miño.
Antonio Ameijide lamenta que a falta de mantemento que se realiza sobre esta ponte, que a día de hoxe segue no limbo xa que nin o Concello de Lugo nin o Ministerio de Transporte, Mobilidade e Axenda Urbana (antes coñecido como Fomento) fanse responsables da infraestrutura, xa é coñecida como a ‘Ponte Verde’ sobre o Miño debido á ausencia total de mantemento.
Unha falta total de interese e traballos que tivo como consecuencia nos últimos días que caeran anacos de formigón “poñendo en risco a seguridade dos lucenses”. Ante esta situación axentes da Policía Local tiveron que acordonar varias zonas da ponte “e o peor é que non é a primeira vez que sucede algo así, xa que hai anos caeron varias pezas metálicas”.
“Basta xa de fotos e propaganda. Lara Méndez ten que poñerse a traballar e manter en boas condicións as infraestruturas de todos os lucenses”, afirmou.
