Antonio Ameijide pon sobre a mesa varios dos proxectos que nos últimos catro anos levan a firma de socialistas e nacionalistas e que unicamente serviron para poñer en pe de guerra aos veciños polas molestias e caos xerados, para destruír máis de 300 prazas de aparcamento e para colapsar co carril bici rúas nas que a circulación era fluída
O goberno de Lara Méndez e Rubén Arroxo pode definirse como “o goberno das chapuzas” despois de ver como o seu último despropósito é como se anulou o proceso de contratación do novo pavillón polideportivo de Lugo.
Antonio Ameijide recorda como desde o Grupo Municipal Popular xa se advertiu hai varios meses das dúbidas respecto ao orzamento reservado para o pavillón, a pesar de que o presuposto aumentase un 40%, superando os 4M€. “A pesar de contar cun orzamento disparatado non foron capaces de crear un pavillón polo que Lugo e os lucenses levamos 24 anos agardando”, denunciou.
Ademais, as alegacións presentadas por varios colexios profesionais demostraron “a chapuza” de Lara Méndez e Rubén Arroxo nos pregos de contratación polo que desde o Grupo Popular esixen “que se redacten de inmediato os novos pregos e que sexan axustados á realidade e a legalidade vixentes”.
O concelleiro popular explica que este é o último exemplo da “nefasta xestión” de socialistas e nacionalistas á fronte do Concello de Lugo, pero hai moitos máis.
O primeiro dos exemplos a citar é o carril bici, unha obra que custou máis de 1M€ de fondos europeos e que unicamente serviu para eliminar máis de 300 prazas de aparcamento nun único barrio, dificultar a circulación en rúas nas que o tráfico sempre foi fluído e para poñer en pe de guerra a miles de veciños que viron como a súa vida diaria e a mobilidade se dificultou por mor desta obra “mal plantexada e sen consensuar”.
As peonalizacións tamén causaron fondo malestar entre os lucenses. Como exemplo, a obra do último treito de Camiño Real que causo fondo malestar entre os veciños e os comerciantes, aos que estes traballos provocaron importantes perdas económicas, sobre todo durante a campaña de Nadal.
O mesmo camiño poden levar os traballos de peonalización do casco histórico que “son un despropósito” xa que o plan de tráfico proposto por Lara Méndez proxecta que pola Rúa Nova, unha vía de entre 5 e 6 metros de ancho e pola que camiñan miles de persoas a diario, agora haxa miles de vehículos circulando cada día.
Outro dos exemplos que se poden poñer sobre a mesa son as Caldas do Miño. Unha infraestrutura na que Lara Méndez non tivo máis remedio que rebaixar a temperatura da auga a 30º xa que sempre defendeu que sería “de uso recreativo” e así cumprir coa normativa estatal e non arriscarse a incumprir o PXOM polas “serías dúbidas existentes da legalidade de instalar unha dotación de uso terapéutico e medicinal” nunha zona verde.
Antonio Ameijide explica que “estes son só algúns dos exemplos das numerosas chapuzas de Lara Méndez e Rubén Arroxo á fronte do Concello de Lugo” ao que engade que “estes catro anos de constantes erros certifican que formaron o goberno máis caro pero tamén o máis incompetente e o peor da historia de Lugo”.
