Tanto Lara Méndez como Rubén Arroxo negáronse a permitir o debate sobre unha moción de urxencia do Grupo Municipal Popular, presentada despois de que o BNG se puxera publicamente en contra e Lara Méndez sementase dúbidas sobre a necesidade desta infraestrutura que ambos levan anos reclamando á Xunta de Galicia
A Rolda Este é unha infraestrutura parcialmente executada, que discorre íntegramente no termino municipal de Lugo, configurando un anel de circunvalación da cidade xunto coas N-640 e N-6.
A Xunta de Galicia, a través da Consellería de Infraestruturas e Mobilidade, recibiu recentemente o proxecto de trazado de prolongación da Rolda Este, dende a glorieta da estrada de Fonsagrada (LU-530) ata a glorieta da Avda. Madrid coa N-6. Unha vía moi demandada por diferentes colectivos da cidade e un compromiso firme da Xunta de Galicia que permitiría pechar o anel de circunvalación, axudando a eliminar tráfico de vías como a do Rato ou a Avda. Fontiñas e que permite establecer o nexo de comunicación principal co Hospital Universitario Lucus Augusti (HULA), que é o centro sanitario de referencia para toda a provincia.
A nova vía, que completa o tramo inicial xa construído entre A Campiña e a estrada de A Fonsagrada, prevé dous carrís por sentido separados por unha mediana incluíndo dous pasos superiores e tres inferiores e un viaducto de 120 m sobre o río Rato e o seu parque.
Estamos a falar dunha infraestrutura clave para o crecemento da cidade que permite vertebrar de norte a sur os desprazamentos e reducir a densidade de tráfico. Un paso máis na comunicación e nunha infraestrutura imprescindible para o desenvolvemento da cidade.
Por todo isto, o Grupo Municipal do Partido Popular, que subscribe esta proposición, considera de interese municipal que o Pleno da Corporación Municipal acorde:
Que o Concello de Lugo apoia a construcción por parte da Xunta de Galicia da infraestructura viaria denominada Rolda Este dando cumprimento a toda a normativa local e sectorial de aplicación.
