A edil popular Mari Teijeiro ve “irresponsable e unha tomadura de pelo” que o goberno municipal despache as numerosas queixas recibidas no Concello polas aulas abertas “dicindo que resolverán en tres meses cando xa teña rematado o verán”
A concelleira do Grupo Municipal do Partido Popular no Concello de Lugo Mari Teijeiro critica a “despreocupación” do goberno socialista en materia de conciliación familiar.
“A última proba da falta de sensibilidade e de concencia nesta materia do goberno municipal é a resposta que están a dar aos pais que formularon protestas no seo da Comisión Municipal de Queixas e Suxestións pola supresión repentina do servizo de Aulas Abertas no centro María Balteira”, xa que, como desvela a popular, “a única solución que lles están a dar é que en tres meses responderán a súa reclamación”. “Resulta irresponsable e unha tomadura de pelo que os socialistas se despachen desta ducia de queixas asegurando que contestarán cando xa teña rematado o verán e, polo tanto, a oferta de Aulas Abertas”, opina Teijeiro.
Nesa liña, a edil popular incide en que “ducias de familias luguesas do entorno da Piringalla e de Sagrado Corazón víronse privadas este verán de servizos de conciliación” que si se ofertaron noutros centros sociais, ao tempo que reitera a necesidade de “homoxeneizar” a prestación de servizos. “O que temos na actualidade son diferenzas de actividades, de horarios e ata de idades en función do barrio no que residan os veciños”, subliña Teijeiro, o que exemplifica con tres casos: hai centros sociais onde admiten nenos de tres anos e outros que non; hai barrios nos que se suprime o programa de Aulas Abertas durante a segunda quincena de agosto a diferenza doutros; e hai diferenzas de ata dúas horas diarias na prestación do servizo segundo a dependencia municipal da que se trate.
Deste xeito, a popular propón que “a experiencia do acontecido este verán sirva para aprender e evitar que se repita a situación”, polo que urxe a que “dende xa, o goberno municipal traballe para garantir que nas vacacións de Nadal os pais de todos os barrios de Lugo poidan ter no seu centro social de referencia este servizo esencial para a conciliación”.
Por último, Mari Teijeiro reitera a necesidade de dar cumprimento ao acordo plenario aprobado a instancias do PP para que se elabore unha Ordenanza Municipal de Servizo de Atención á infancia mediante a que se regule o acceso ás prazas que se ofrecen nas ociotecas, aulas abertas e campamentos municipais organizados tanto nos centros de convivencia como nas casas das linguas. “Sería un xeito de igualar o funcionamento e os criterios de admisión nas prazas que se ofertan dende o Concello para a conciliación da vida persoal, familiar e laboral”, subliña a edil popular “para evitar que, por culpa do goberno, existan familias de primeira e outras de segunda”.
