Para os populares, a rexedora tenta xustificar un problema inadmisible e que hai que combater con políticas e leis claras que protexan a propiedade privada
No Grupo Popular din que ás últimas declaracións da alcaldesa, nas que vincula as okupacións á falta de vivenda pública, son unha tomadura de pelo. Para Ramón Carballo resulta indignante que “Lara Méndez pase de negar a okupación a xustificala”.
O voceiro popular Ramón Carballo lamenta que a alcaldesa de Lugo “en vez de loitar contra a okupación a siga amparando”. O popular lembrou como “a nós chamáronnos alarmistas por pedir solucións e frear o efecto chamada das okupacións” matizando que “agora como a veciñanza dun dos barrios máis afectados de Lugo, como é o da Milagrosa, non aguanta máis recoñecen o problema”.
Carballo manifesta que “a forma de actuar da alcaldesa é reiterativa: cando hai un problema en vez de buscar solucións busca culpables e, curiosamente, sempre hai confrontación coa Xunta”.
Os populares lémbranlle á alcaldesa que ten instrumentos municipais para atender a persoas vulnerables “conta coas partidas de Emerxencia Social” suxeríndolle que “amplíe a súa contía e reduza os gastos de autobombo persoal”.
