A concelleira do Grupo Municipal do PP Beatriz Vázquez critica a ausencia de proxecto de PSOE e BNG para destacar as fiestras arqueolóxicas da cidade que actualmente poñen en valor os cubos de fregona que se empregan para recoller a auga das goteiras
A concelleira do Grupo Municipal do Partido Popular no Concello de Lugo, Beatriz Vázquez, cualifica de “vergoñenta” a imaxe que o bigoberno de Lugo está a permitir que se transmita da cidade, despois de comprobar como hai restos arqueolóxicos protexidos cheos de cubos de fregonas para evitar que as goteiras danen este patrimonio, non sendo a primeira vez que optan por este parche.
Beatriz Vázquez explica que esta situación está a darse constantemente porque o método empregado para a instalación e posterior reparación das fiestras arqueolóxicas de Doutor Castro “non é o adecuado” polo que a auga segue a filtrarse periodicamente, tendo o goberno local como única solución a colocación de cubos de fregona.
A concelleira popular incide no “vergoñento” desta situación e do abandono destes restos arqueolóxicos, xa que se está a dar “unha imaxe bochornosa” ao ver un mosaico romano protexido con cubos de fregona. “Estamos ante o fiel reflexo da política de parches de socialistas e nacionalistas, empeñados en presentar unha imaxe de Lugo cada vez peor. Quizais sería máis útil que eses cubos de fregona os empregasen para recoller as pingueiras da súa neglixente xestión”, afirmou.
Ante esta situación, dende o Grupo Municipal Popular se volverán a presentar preguntas ante a comisión correspondente para coñecer os motivos de chegar a esta situación e para ver comprobar se agora os concelleiros do goberno responden ás preguntas relacionadas coas fiestras arqueolóxicas, xa que na última comisión que preguntamos por este tema “non respostaron ás preguntas” agochándose en negacións e na ausencia de funcionarios.
