O Grupo Popular presentará no pleno deste mes de xaneiro unha serie de propostas centradas en impulsar o talento local, mellorar a mobilidade e revitalizar os espazos urbanos
Lugo Cidade Universitaria
Desde o Grupo Popular pensamos que hai que aproveitar o potencial do Campus Terra e do talento universitario para deseñar o Lugo do futuro. Na iniciativa que levamos ao pleno do xoves defendemos convenios específicos para integrar o coñecemento académico en proxectos municipais, bolsas de traballo con empresas locais e prácticas remuneradas no Concello para fomentar a inserción laboral da mocidade.
“Investir no talento local é investir no futuro de Lugo. Fortalecer a marca Lugo, Cidade Universitaria, non é só un obxectivo, senón unha necesidade estratéxica”, afirmou Elena Candia, portavoz do Grupo Popular. Lamentamos que, mentres outras cidades avanzan neste eido, o goberno local siga externalizando estudos clave a empresas de fóra que descoñecen a nosa realidade.
Mobilidade
Unha das prioridades que temos no Partio Popular é a de solucionar o problema do aparcamento e mellorar a mobilidade en Lugo. Por iso propoñemos finalizar a Avenida Vila Verde, a rúa que conecta Catasol con Sanxillao e que segue cun tramo central sen urbanizar, algo que o Concello puido ter feito hai anos pero que segue sen resolver.
É significativo que incluso un dos socios de goberno, o BNG, coincidan connosco en que abrir esta rúa non exime da necesidade de crear un novo aparcamento en Fontiñas.
O Concello debe liderar este proxecto, activando os mecanismos necesarios para redactar e aprobar os proxectos de planeamento, reparcelación e urbanización.
Revitalizar Recatelo e coidar o Parque de Rosalía
A terceira proposición que defenderemos no pleno é para impulsar un plan integral para revitalizar Recatelo e o Parque de Rosalía, poñendo en valor este espazo do que os lucenses nos sentimos orgullosos e que presenta un estado de abandono. Propoñemos un programa permanente de conservación para garantir o coidado deste Ben de Interese Cultural e accións de revitalización do barrio de Recatelo para promover a súa dinamización social e económica.
Administración áxil e cercana
Froito da reunión cos representantes do Colexio de Xestores Administrativos, levamos a pleno a súa proposta de mellorar as aplicacións do Concello para facelas máis intuitivas e dinámicas e recoñecer aos xestores administrativos como representantes dos seus colexiados, facilitando o acceso a documentos clave como certificados de empadroamento ou de estar ao día nos impostos, de cartas de pago de anos anteriores.
“Unha administración moderna e eficaz é esencial para unha cidade que quere avanzar”, concluíu Candia. É preocupante que o Concello de Lugo continúe operando con ferramentas obsoletas que dificultan as xestións diarias dos veciños e profesionais.
