Ramón Carballo afirma que os lucenses merecen unha alcaldesa que mire por Lugo e non unha marioneta cuxa única preocupación é repetir ao ditado do PSOE un relato cociñado contra de Elena Candia
Mentres o Partido Popular busca solucións aos problemas que preocupan aos lucenses intentando poñer freo a suba dos aparcadoiros; reclamando que traballen para eliminar os tapóns urbanísticos que hai en Lugo dende a era das pesetas, pedindo unha maior presenza policial nos barrios ou buscando alternativas e financiamento para mellorar a conexión do polígono das Gándaras coa A-6… á alcaldesa de Lugo o único que lle preocupa é facerlle oposición á candidata do PP á alcaldía.
Os lucenses non merecemos unha alcaldesa cuxa única preocupación é repetir, ao ditado do PSOE, un relato cociñado contra Elena Candia. Resolvan os seus problemas de liderados onde os teñen que resolver e tómese en serio o traballo por Lugo. Quero recordarlle que o seu líder desexado foi quen autorizou as licenzas das Torres do Garañón e que , por moito que intenten manipular, os lucenses sabemos que se hai que tirar o Garañón é porque alguén lle deu mal a licenza e, ese alguén, foi o seu padriño político o señor Besteiro.
Levamos varios días espertándonos cunha alcaldesa cuxo traballo é facer oposición a nosa candidata. Este tipo de actitudes demostran: primeiro o seu nerviosismo porque as enquisas non lle son favorables; segundo que son un goberno esgotado e, terceiro que están moi afastados do que lles preocupa á cidadanía.
No Partido Popular mentres vostedes defenden ao seu líder desexado seguiremos traballando e presentando iniciativas que sexan útiles para os cidadáns coma as que hoxe imos defender no pleno.
