Os concelleiros populares amosaron a súa sorpresa tras ver o estado desta vía municipal que, segundo afirmaron os propios veciños, os concelleiros do goberno local se negan a arranxar nin a dar solución algunha os problemas que ten, como a imposibilidade para evacuar a auga correctamente cando chove con intensidade
O abandono do goberno de PSOE e BNG polo rural é algo coñecido pero hai situacións que seguen a sorprender polos problemas que xeran aos veciños de Lugo. Un destes casos é na Tolda de Meilán, concretamente na rúa Camiño do Tronzo, unha vía que o goberno local se nega a arranxar a pesar de que figura no inventario municipal como de titularidade do Concello de Lugo.
Os concelleiros populares que se achegaron ata a zona para escoitar as reclamacións dos veciños comprobaron como o enfado é “máis que fundamentado” xa que unha vía de 400 metros non ten nin asfalto e as vivendas non teñen nin abastecemento de auga corrente nin saneamento a pesar de que os negocios que hai na zona si que teñen estes servizos municipais e, as vivendas que hai na outra beira da N-VI, tamén contan con abastecemento e saneamento.
O primeiro problema que teñen nestas vivendas é a ausencia de servizos básicos como abastecemento e saneamento. Na actualidade, os veciños desta rúa abastécense de pozos propios, pese a que a menos de 10 metros hai industrias que teñen auga potable da traída municipal. “Non se pode entender como estas catro vivendas están rodeadas de industrias e outras vivendas que teñen os servizos básicos e deixan a estas casas sen eles”, lamentan.
Outra das peticións é o asfaltado da rúa. Na actualidade está en terra, cemento e pedras, o que dificulta a circulación. Esta rúa comunica a N-VI (á altura do serradoiro Forestal Peninsular) co polígono de O Ceao (rotonda de Muebles Ceao), “unha vía de 400 metros que está en tan mal estado que se tardan máis de dous minutos en recorrela en coche”.
A falta dun asfaltado axeitado é un problema serio ata o punto de que os sumidoiros están completamente tupidos, polo que non desaugan correctamente a auga provocando que entre nas vivendas. “É necesario poñer en orde esta rúa porque desde o goberno local seguen a mirar cara outro lado e nin dan orde de limpar os sumidoiros chegando unha das veciños a pagar ata en catro ocasións a unha empresa privada por limpar os sumidoiros”, explican.
Outras eivas a corrixir na zona son mellorar a accesibilidade da rampla que dá acceso ao paso elevado na N-VI (á altura do serradoiro) xa que presenta un desnivel demasiado pronunciado como para poder ser usado por persoas en cadeira de rodas ou por maiores. Tamén se pide unha solución á colocación do colector do lixo que hai ao carón deste paso elevado xa que se colocou ao outro lado da cuneta o que impide que, por exemplo, a xente maior poida levar o lixo, sen esquecer que non hai colectores para realizar unha recollida selectiva.
