O vicevoceiro popular Antonio Ameijide afirma que a política de parches delata a nefasta xestión do tráfico en Lugo e interpreta esta medida como unha estratexia da alcaldesa para mercar os votos doutros grupos para sacar adiante os orzamentos
O PP acusa a alcaldesa de Lugo de poñer en práctica unha política de parches con actuacións improvisadas como a implantación hoxe da zona 30 na ronda da muralla. “Estamos ante unha solución illada e curta de miras que non resolve os problemas reais da mobilidade na cidade. Seguimos con caos no tráfico e no estacionamento, seguimos sen ter un transporte público atractivo e de calidade e sen contar cunha sinalización e mantemento de vías axeitados para mellorar a seguridade viaria”, reflexionou Ameijide.
Para o vicevoceiro popular Antonio Ameijide “esta forma de actuar pon en evidencia a nula capacidade de xestión dos socialistas en materia de tráfico no que leva de mandato”. “Estamos diante doutra cortiña de fume para tapar as súas vergoñas e a súa ineficacia”.
O vicevoceiro popular interpreta este novo paso como unha estratexia da alcaldesa para comprar os votos doutros partidos para sacar adiante os orzamentos que segue sen presentar e que ao paso que imos parece que ainda tardarán.
Antonio Ameijide tamén ironizou coa forma coa que a alcaldesa anuncia unha medida de tanto calado como esta e que “afecta a unha das principais arterias que vertebran o tráfico de Lugo” engadindo que “é insólito que organicen un acto público para colocar un coxín redutor de velocidade e que no caso da implantación da zona 30 da Ronda sexa unha total improvisación”.
