PSOE e BNG votaron hoxe en contra de que o Concello de Lugo busque con urxencia unha parcela ou un inmoble que cumpra os requerimentos necesarios para a construcción deste centro sanitario. Dende o PP censuran a actitude de socialistas e nacionalistas lembrando que o seu grupo leva anos liderando a creación de novos equipamentos para o barrio como foi a defensa do novo colexio que se inaugurou este ano.
O Pleno do Concello de Lugo aprobou na sesión celebrada en data 22 de novembro de 2019 unha proposición presentada polo Grupo Municipal do Partido Popular na que se acordou:
1º.- Instar á Xunta de Galicia a realizar todos os trámites precisos para a construción dun novo centro de saúde no barrio do Sagrado Corazón.
2º.- Instar ao Concello de Lugo a colaborar activamente dentro das súas competencias no proceso de construción dun novo centro de saúde no barrio do Sagrado Corazón, e a colaborar na posta a disposición dos terreos ou inmobles necesarios, garantindo que se atopen na contorna mais próxima ao barrio.
3º.- Instar á Xunta de Galicia a que contemple como localización prioritaria para a construción do centro de saúde as instalacións do actual colexio.
Pois ben, como o tempo transcorría e non había novas sobre as xestións que o Concello estaba a levar adiante para conseguir a cesión dos locais do antigo colexio, propiedade de Abanca, en data 15 de setembro de 2021, o GMPP formulou na comisión correspondente, diversas preguntas relativas ao estado no que se atopaban as negociacións con Abanca para a cesión dos terreos e, si non se conseguía a cesión, si o Concello tiña algún estudio de locais ou terreos que puidese servir como alternativa.
En resposta ás mesmas, a concelleira Dona Paula Alvarellos manifestou que se estaba a traballar nun convenio de colaboración a tres: Xunta de Galicia, Abanca e o Concello de Lugo. Respondendo igualmente que, dado que a predisposición de Abanca era total, non se contemplaba outra hipótese de localización para o Centro de Saúde.
Pois ben, a día de hoxe tampouco consta ningún avance para a cesión do devandito edificio polo que cremos que o Concello, sen desbotar esa posibilidade de acordo, ten que buscar con urxencia unha alternativa para poñer a disposición da Consellería de Sanidade o citado inmoble ou un terreo para a construción dun novo centro de saúde, no núcleo do barrio.
Neste sentido cómpre recordar que o Conselleiro de Sanidade remitiu unha comunicación á Sra. Alcaldesa, neste mesmo mes de marzo, na que plantexa que, á vista de que a negociación con Abanca no dá os froitos esperados, a opción da Consellería de Sanidade sería que o concello cedese á Xunta unha parcela viable e libre de cargas para construílo. Na misiva reiteraba a disposición da Xunta para axudar na localización do terreo e visitar e avaliar as parcelas que o concello considere, co fin de determinar se cumpren ou non coas necesidades requiridas desde o punto de vista técnico.
Por todo elo o Grupo Municipal do Partido Popular, que subscribe esta proposición, considera de interese municipal que o Pleno da Corporación Municipal acorde:
Que o Concello de Lugo, acelere as negociacións que mantén con Abanca para a cesión do inmoble do antigo colexio, e se estas no chegan a concretarse, busque con urxencia un solar ou inmoble no núcleo do barrio, que cumpra os requirimentos necesarios para a construción dun novo Centro de Saúde no Sagrado Corazón e que a Xunta de Galicia poida construír esta dotación no barrio o antes posible.
