Os populares piden á alcaldesa socialista Lara Méndez e ao seu socio de goberno o nacionalista Rubén Arroxo que deixen de facer seguidismo do “caciquismo moderno que implantou en Lugo un alto cargo socialista nas adxudicacións de concesións, abuso de contratos menores …”
O voceiro do Grupo Popular de Lugo lamenta que, unha vez máis, os lucenses sexan os que paguen a corrupción do PSOE “as tramas de 20 anos de gobernos socialistas saénnos moi caras” reflexionaba Ramón Carballo. “O diñeiro que presuntamente se embolsou un cargo socialista a cambio de pagar favores a empresas amigas é un exemplo do caciquismo moderno que se implantou no concello de Lugo”.
Carballo pide á alcaldesa “que non tape este funcionamento anormal da administración” e espera que “o bigoberno aprendera a lección dos seus padriños políticos para que non se repitan máis casos coma estes xa que este tipo de escándalos o único que fan é devastar a imaxe de toda a clase política e supoñen unha perda de confianza para os cidadáns nos que xestionan os fondos públicos”. “Un caso así afecta á imaxe de todos os políticos, cando os políticos temos que ser sinónimo de solucións e non de problemas” matizou Carballo.
O PP insistiu, dende o primeiro momento no que se adxudicou o contrato a Cechalva, que “era un mal negocio para Lugo”. De feito “fomos o único grupo político que non apoiou esta operación na mesa de contratación celebrada o 4 de novembre de 2005. Denunciamos que “era un servicio deficitario para os intereses dos lucenses e que supoñía unha sangría económica (entre 2005 a 2017 nos custou 5.2M€) e por iste motivo pedimos cambiar a xestión do servizo.
O PP tamén lembra que existe un acordo de pleno do ano 2015 no que o BNG propoñía remunicipalizar o servizo do guindastre, unha opción que o PP sempre defendeu tanto con iniciativas propias como doutros grupos dado o burato económico que supoñía para as arcas municipais. Os populares indican como “sorprendentemente” a postura nacionalista mudou dende que está no goberno.
