• Elena Candia: “Os fondos europeos deben ser un impulso positivo para Lugo, e non unha fonte de problemas que freen o potencial do concello”.
• Adrián Vazquez: “O comercio é a alma das cidades europeas, e é importante que a UE adopte unha estratexia clara para impulsalo”
Martes 29 de outubro de 2024
Na reunión que tivo lugar esta mañá coa Asociación Lugo Monumental e na que participou o eurodeputado do PP, Adrián Vázquez Lázara, xunto coa voceira popular Elena Candia e concelleiros do Grupo Popular se acordou trasladar á Unión Europea a situación derivada dos fondos europeos destinados ao casco histórico da cidade
Os retrasos das intervencións e a falta de planificación están provocando peches de comercio local (como o que coñecíamos esta mesma semana que establecía unha relación de causa con estas obras) así como sucesos que afectan á seguridade da veciñanza con caídas frecuentes, por mor das obras, como a que tivo lugar esta mañá.
Os comerciantes están preocupados porque as obras de peonalización, financiadas por Europa, lonxe de apuntalar o crecemento e a dinamización desta zona, está a provocar incertezas e graves prexuízos como así o reflicten os transtornos que provocan nas actividades económicas.
O eurodeputado Adrián Vázquez tras escoitar aos representantes de Lugo Monumental reflexionaba que “o que está facendo a alcaldesa de Lugo cos fondos europeos é inaceptable” engadindo que “o diñeiro europeo está para o que está: ou sirve para impulsar e modernizar as nosas cidades, ou non sirve para nada”
A voceira popular explicou que “os recursos europeos deben ser sinónimo de progreso e non de despilfarro” e que deberían servir para mellorar a calidade de vida dos lucenses cando a realidade dos proxectos que o PSOE e o BNG fixeron en Lugo son: unhas caldas pechadas; un edificio verde sen utilidade e un carril bici deteriorado e sen uso polo que seguimos pagando cartos.
