Para os populares o voto en contra do bigoberno condena aos clubes e aos deportistas individuais a empregar instalacións saturadas ou a non adestrar
A Consellería de Educación da Xunta de Galicia e a Federación Galega de Municipios e Provincias (FEGAMP) firmaron recentemente un convenio para formalizar a apertura das instalacións deportivas dos IES para o seu uso xeral por parte dos veciños fora das horas lectivas.
Este acordo pretende darlle seguridade xurídica e facer que esta práctica se extenda con carácter xeral xa que abre numerosas posibilidades para a optimización de recursos, e á súa vez ofrecer máis espazos para a práctica do deporte tanto a clubes como a particulares.
Este convenio facilita a posibilidade de que o concello e os directores dos IES se poñan dacordo sobre o uso das instalacións fora do horario lectivo, coas garantías e o control preciso para poder levar a cabo todo tipo de actividades deportivas que en moitos casos se ven impedidas pola falta de instalacións axeitadas e de calidade. É un xeito de, por unha banda, aproveitar unhas instalación infrautilizadas e, por outra, abrir un amplo abano de actividades que facilita a práctica de deporte e de actividades saúdables e que en moitos casos pode ser unha ferramenta que facilite a conciliación familiar.
A día de hoxe naide cuestiona os beneficios que a práctica do deporte reporta para as persoas e, fundamentalmente, para os nenos e adolescentes. É fundamental que a mocidade vexa na práctica do deporte unha alternativa real de ocio e é obriga das institucións poñer todas as facilidades ao alcance para que realmente se perciba como unha opción no tempo de lecer.
A práctica do deporte debe ser un fin en sí mesmo, un xeito lúdico e divertido de facer exercicio que ademáis permite ampliar o círculo de relacións sociais así como desenvolverse como persoas de forma sana e saúdable.
É responsabilidade da administración local aproveitar todos os recursos dos que dispón para poder dar resposta ás necesidades dos deportistas da cidade e da cidadanía en xeral, poñendo a súa disposición as instalacións existentes que poden ser moi útiles para desconxestionar aquelas que actualmente están abertas e saturadas.
Por todo isto, e dado que o convenio da FEGAMP establece que as solicitudes deben realizarse no mes de setembro e debido á saturación das instalacións deportivas municipais, o Grupo Municipal do Partido Popular, que subscribe esta proposición, propón unir os esforzos de todos e considera de interese municipal que o Pleno da Corporación Municipal acorde:
- Poñer as instalacións que hai nos CEIPs de Lugo a disposición dos clubes deportivos da cidade e dos veciños en xeral coa finalidade de desatascar a saturación existente nas poucas pistas dispoñibles na cidade.
