O concelleiro do Grupo Municipal do Partido Popular Óscar Poy explica que esta iniciativa daría aos lucenses unha alternativa máis durante os días de confinamento e axudaría a levar uns hábitos de vida saudables e evitar o aumento de peso que se pode producir debido ao sedentarismo que propicia a obriga de quedar na casa
O concelleiro do Grupo Municipal do Partido Popular no Concello de Lugo, Óscar Poy, insta ao goberno local a por a disposición de todos os lucenses unha APP móbil e información na web municipal para que durante o tempo que dure o confinamento poidan realizar unha actividade física regular nas súas vivendas e así afrontar doutro xeito os días que aínda resten por quedar na casa. Rutinas de adestramento que poderían ser sen necesidade de elementos nin equipamentos propios dos ximnasios, se non con elementos que calquera lucense pode ter na casa.
Óscar Poy sinala que sería outra vía para que o Concello de Lugo poña o seu gran de area para facer máis sinxela esta etapa aos lucenses, xa que se trata dun momento “moi complicado” no que “todos temos que colaborar quedando nas nosas casas”. “No momento no que nos atopamos o Concello de Lugo debería facilitar esta ferramenta xa que a saúde física axuda a que o confinamento se leve mellor”, sinalan.
Para os concelleiro do Grupo Municipal Popular esta iniciativa é moi importante xa que o exercicio físico axuda a controlar a ansiedade, activa o sistema inmunitario, axuda a paliar os efectos que a falta de movemento do confinamento provoca no corpo e ademais axuda a ter outra actividade para pasar o día.
Neste senso, desde o Grupo Municipal Popular ínstase ao bigoberno a poñer en marcha esta APP que tería que ser gratuíta para facilitar o acceso a toda a cidadanía e ademais pensando as rutinas físicas segundo diversos eidos, como poden ser os rangos de idade ou o estilo de vida de cada un.
Óscar Poy sinala que esta APP podería aportar tamén consellos sobre nutrición para evitar que o sedentarismo ao que convida o confinamento propicie un aumento de peso non desexado. “Son moitos os expertos que aseguran que ao pasar tantos días seguidos na casa as persoas caen nunha rutina que propicia que comamos dun xeito indebido e alimentos que non son recomendable”, sinalan, polo que debido que durante estas semanas se reduce o movemento e o gasto calórico sería propicio que se aportaran consellos sobre alimentación e incluso receitas saudables e sinxelas de facer contando coa axuda dos máis pequenos da casa para darlles a eles tamén máis alternativas durante o día.
