• Ramón Cabarcos: “Sabíamos que as Caldas foron un investimento inútil, pero o grave é que tamén se convertiron nunha infraestrutura insegura”
• As instalacións estiveron abertas durante 19 meses sen alta da auga quente nin un plan completo de prevención
Martes 25 de febreiro de 2025
O vicevoceiro Ramón Cabarcos explicou que as Caldas estiveron abertas durante 19 meses sen ter dada de alta a instalación de auga quente e sen un plan completo de prevención, o que pon en evidencia unha falta absoluta de previsión e control.
O goberno local, lonxe de asumir responsabilidades, tenta agochar a súa neglixencia escudándose en trámites formais. De feito solicitamos en varias ocasións o acceso ao expediente completo das Caldas como non nolo entregaron tivemos que recurrir a través da nosa voceira na súa calidade de deputada ao artigo 9.2 do Regulamento do Parlamento, que permite obter documentación oficial sobre asuntos de interese público. Na documentación facilitada coñeciamos que as Caldas non estaban rexistradas ante a autoridade sanitaria competente no momento en que se detectou o brote de lexionella no pasado mes de setembro
As Caldas do Miño é un exemplo paradigmático da mala xestión do goberno local: improvisación, falta de transparencia e descontrol no gasto. A infraestrutura non só se converteu nun pozo sen fondo de recursos municipais, senón que a súa xestión deficiente representou un risco para a seguridade sanitaria dos usuarios.
Esta infraestrutura, que supuxo un importante investimento de fondos públicos, leva meses pechada tras detectar concentracións de lexionela moi superiores aos límites permitidos.
“A alcaldesa ou en quen delegue debe comparecer no pleno para aclarar a situación e asumir responsabilidades. O seu deber é explicar por que se abriu esta instalación en condicións irregulares, por que se tardou tanto en tomar medidas e cal é o futuro dunha infraestrutura que está a supor un lastre económico para as arcas municipais”, sinalou a portavoz do PP.
O Grupo Popular agarda que o goberno local non se escude, unha vez máis, en desculpas para evitar dar explicacións. Lugo merece un goberno que rinda contas e que actúe con responsabilidade e transparencia, e non un executivo que oculta problemas e pon en risco a xestión dos recursos públicos e a seguridade cidadá.
