A concelleira popular Mari Teijeiro afirma que “para evitar desigualdades na prestación do servizo, que se ofrece en tres centros sociais do municipio, é necesario cambiar o sistema de acceso, unificar horarios e programas”
O Grupo Municipal do Partido Popular critica o desinterese dos socialistas por impulsar e actualizar o servizo das ociotecas que funciona nos centros sociais de Maruja Mallo, Frigsa e Uxío Novo Neyra.
A popular Mari Teijeiro presentou un paquete de tres medidas para actualizar esta prestación que busca favorecer a conciliación familiar “o primeiro paso é sacar o novo prego de condicións que xa leva máis dun ano caducado”. “Xa se pagaron, con reparos de legalidade uns 130.000 euros” matizou a edil popular lembrando que “o custe desta prestación é duns 9.500 ao mes”.
Outro punto que a popular propón abordar é a elaboración da Ordenanza municipal que regule o funcionamento dos servizos de atención á infancia que presta o Concello nas ludotecas e que, na actualidade, comprende o programa Aprende Xogando ou as Aulas abertas dos periodos vacacionais. Esta normativa debería contemplar, entre outros aspectos, a homoxeneización do servizo en idade de acceso e horarios “debemos evitar diferenzas de prestación segundo o barrio onde residan os rapaces e rapazas” Teijeiro aludía á oferta do pasado verán das ociotecas onde “había centros que admitían a nenos de tres anos mentres outros non, e onde nalgúns, o horario era máis amplo que noutros”. Outras cuestións para mellorar a prestación das ociotecas son “favorecer a matrícula por días soltos ou períodos semanais; facilitar a fórmula de matrícula on line e, na concesión das prazas, ter en conta baremos máis xustos e non só atender á orde de inscripción; mellorar a rátio de atención (a día de hoxe é 1 monitor x 26 menores ou 1x 30) e contar cun proxecto educativo básico e programacións adaptadas en caso de necesidades específicas así como garantir a substitución de persoal en períodos de incapacidade ou de descanso, contando sempre cun mínimo de 2 monitores por aula.
A terceira actuación que propón a popular Mari Teijeiro é chequear o estado dos locais de Frigsa, Maruja Mallo e Uxio Novoneyra onde se presta o servizo de ociotecas “co obxecto de corrixir as deficiencias que podan presentar estes espazos en canto a climatización ou saneamento”.
O GMPP de Lugo avanzou que pedirá explicacións á Concelleira responsable da area de benestar e igualdade sobre o funcionamento deste servizo na vindeira Comisión de Benestar. Teijeiro esixiu á concelleira socialista “unha maior implicación para o desenvolvemento de acordos plenarios que redundan en beneficio da cidadanía”. A edil do PP enumerou outros incumprimentos de acordos plenarios como a elaboración do pacto contra a probreza, a reactivación da Mesa Técnica para tratar a violencia de xénero ou a elaboración do regulamento de funcionamento dos centros de convivencia.
