Beatriz Vázquez explica que se realiza esta achega “en positivo” para que as patronais recuperen o seu esplendor de anos atrás e non fiar o seu éxito, como nos últimos tempos, ao bo tempo que nos acompañou
Unha vez rematado o San Froilán, desde o Grupo Municipal do Partido Popular preséntase un decálogo de medidas para que as patronais lucenses recuperen o esplendor que tiveron anos atrás e volvan a ser a gran festa do outono galego.
Un “decálogo en positivo” como explica a concelleira popular Beatriz Vázquez para reforzar a imaxe do San Froilán e a súa organización e que o éxito das patronais lucenses non dependa exclusivamente de se o bo tempo nos acompaña ou non.
Decálogo de como mellorar a vindeira edición do San Froilán:
- Mellorar a planificación e organización do San Froilán de xeito que as contratacións dos concertos ou a elección de pregoeiros e oferentes queden pechadas no primeiro trimestre do ano
- Incorporar concertos de tirón nacional ou internacional
- Dar participación real aos membros da comisión de festas para así recuperar o seu espírito, de xeito que os membros do resto de grupos da corporación non se convertan en convidados de pedra
- Que a organización do San Froilán sexa totalmente transparente na contratación para frear o sectarismo
- Dar publicidade, e con tempo suficiente, ás principais actuacións e piares do programa para poder realizar promoción con antelación en albergues do Camiño de Santiago, na provincia e no resto da comunidade e naquelas cidades coas que estamos irmandados
- Dar estabilidade á contratación das casetas e caldeiros do polbo
- Que o San Froilán leve actividades a todos os barrios
- Ter planificadas alternativas para reubicar noutras localizacións os concertos no caso de que haxa mal tempo
- Mellorar o mantemento do recinto feiral xa que hai anos que non se realiza, por exemplo, a renovación das escalinatas das costas do parque Rosalía de Castro, moi deterioradas e cada vez máis perigosas
- Mellorar a limpeza do feiral e dos principais puntos de concentración de xente reforzando os equipos de limpeza á vista das queixas pola falta de aseo e polas imaxes de papeleiras e colectores de lixo cheos
Beatriz Vázquez fai estas achegas na procura “dun San Froilán para todos e máis participativo” xa que nas patronais lucenses teñen cabida todos os gustos e sensibilidades polo que “dende o propio Concello de Lugo temos que ser responsables e contar cunhas patronais para todos e cada vez mellores”.
