Os populares defenderán unha moción de urxencia no pleno para que o Concello de Lugo execute de inmediato o auto e lembran a Paula Alvarellos que xa rematou o prazo de 20 días dado polo xulgado para contratar de novo ás traballadoras
O Grupo Municipal do Partido Popular presentará ao pleno do xoves unha moción de urxencia para que o Concello de Lugo readmita de inmediato ás catro traballadoras do servizo 010 despedidas e que, segundo un auto xudicial o goberno local ten que reincorporar de inmediato.
Antonio Ameijide sinala que se pedirá nesta iniciativa a execución inmediata do auto xa que xa pasaron os 20 días de prazo que daba o auto para reincorporar ás catro empregadas. “Paula Alvarellos, como profesional do dereito que é, debería saber mellor que ninguén a obriga que ten de executar en prazo este auto”, sinala.
Colección de causas xudiciais perdidas
Os concelleiros populares aseguran categoricamente que a xestión deste goberno local á fronte do servizo de persoal “é un fiasco” enumerando a colección de causas xudiciais perdidas, que se suman á marcha do xefe de persoal hai poucos días.
– A condena por ter a un psicólogo traballando como informático
– A sentenza que anulou o nomeamento do xefe de arquitectura o obrigou ao goberno local a readmitir á outra candidata do proceso
– A condena a pagar a un policía local o complemento de nocturnidade que o goberno local deixou de pagarlle
– A condena a pagar a un policía local o que o goberno local lle rebaixou durante o permiso de paternidade
– A condena ao Concello de Lugo a repetir o exame de promoción interna dunha praza de enxeñeiro de camiños
– A condena ao Concello de Lugo a recoñecer como persoal laboral a un traballador
– A condena ao Concello de Lugo a devolver aos lucenses o cobrado de máis pola taxa de vaos
Outro exemplo da neglixente xestión de Paula Alvarellos son 115.207.837,3€ pagados con reparos de legalidade dende que é responsable de economía.
“Paula Alvarellos poderá dar leccións de moitas cousas pero, de respecto á legalidade non. Para dar leccións hai que ter lexitimidade e, neste caso, Alvarellos está totalmente desacreditada”, sentencia.
