O vicevoceiro popular, Antonio Ameijide, urxe aos socialistas a convocar “antes dos orzamentos de 2017 todas as prazas de funcionarios e laborais pendentes, as que veñen da OPE de 2015, as que resulten da de 2016 e as dos servizos esenciais”
O vicevoceiro do Grupo Municipal do Partido Popular, Antonio Ameijide, afirmou esta mañá en rolda de prensa que a política de persoal municipal está “máis encallada e máis enquistada ca nunca”.
Nesa liña, Ameijide asegurou que “lonxe de mellorar tras a chegada da alcaldesa, a situación non deixou de deteriorarse”, con servizos que, “engadidos a aqueles que xa viñan manifestando problemas, como o de augas ou electromecánicos” fóronse sumando outros novos, “provocados polos caprichos do novo goberno”, como a Policía Local, cun nomeamento irresponsable do encargado de tramitar as sancións ao non ter a categoría profesional requerida para iso, ou na Escola Municipal de Música, “no aire pola falta de solucións”. Deste xeito, o vicevoceiro lamentou que “nin sequera deron un mínimo paso cos nove servizos que declararon esenciais (Actas e Goberno, Intervención, Asesoría Xurídica, Tesourería e Contabilidade, Facenda Local e Inspección Tributaria, Administración Electrónica, Emprego, Escolas infantís e a xestión dos comedores escolares), o que deixa ben ás claras que a política que fai este goberno local é só de cara á galería e buscando o titular nos medios, non atender as necesidades do lugueses”.
Paralelamente, solicitou que se cubran todas as vacantes co persoal “tal como a lei nos permite”, para o que urxiu aos socialistas a sacar adiante a Oferta de Emprego Pública de 2015, “aprobada case cun ano de retraso, o 23 de decembro e non publicada no BOP ata o 23 de xaneiro de 2016” e, ademais, a “desatascar” a de 2016, que “cando estamos a piques de rematar o ano, aínda nin sequera se levou á mesa negociadora”. “O que demostra todo isto é que os socialistas non empregaron todos os recursos que teñen ao seu alcance para paliar as necesidades apremiantes de persoal, nin sequera nos departamentos de Bombeiros e de Policía Local”, valorou, ao tempo que puxo sobre a mesa “o risco” de que ducias de empregos se acaben perdendo por non levar a cabo a cobertura das prazas en tempo e forma xa que, de acordo coa taxa de reposición, só se pode realizar ao ano seguinte de producirse a baixa.
Relación de Postos de Traballo (RPT).-
Por outra banda, o vicevoceiro popular tamén detallou que o venres 4 de novembro de 2016 este grupo político rexistrou unha proposición para que, antes da aprobación dos orzamentos municipais de 2017, o Concello dispoña dunha RPT actualizada que regularice a situación irregular de máis de 100 postos de traballo. Nesa liña, o popular insistiu en que “a vixente, de 2006, non se axusta á realidade actual do Concello”, posto que existen traballadores que ocupan postos que non figuran na RPT, “advertencia que sistematicamente fai o interventor municipal”, mentres que outros postos que si se recollen neste documento non están cubertos. A este respecto, Ameijide apelou á conveniencia de reasignar efectivos para redistribuílos tendo en conta o volume de traballo que teñen.
Por último, o popular considerou “un escándalo” que “a nova directora xeral de persoal, nomeada hai catro meses, se desentenda agora desta actualización, cando segundo o goberno, era un dos principais cometidos e unha das prioridades polas que se contrataba esta persoa”.
O vicevoceiro popular, Antonio Ameijide, urxe aos socialistas a convocar “antes dos orzamentos de 2017 todas as prazas de funcionarios e laborais pendentes, as que veñen da OPE de 2015, as que resulten da de 2016 e as dos servizos esenciais”
