A concelleira do Grupo Municipal do Partido Popular, Aurora Goáz, celebra que, despois de seis anos de insistencia, o goberno local estea a punto, segundo trascendeu hoxe nun medio local, de adherirse ao programa VioGén. “Acertan cando rectifican, unha vez máis”, sinalan os populares, que levan dende 2019 reclamando esta adhesión a través de diversas iniciativas levadas a pleno.
Na última Comisión de Benestar, celebrada en decembro, unha representante do goberno local manifestaba que “penso que temos que escapar do titular de prensa, de firmar un papeliño, e o que temos que pensar é realmente en facer políticas que axuden ás mulleres”. Para os populares, este comentario demostra o desprezo e a falta de compromiso real do goberno local, xa que a adhesión a VioGén non é un trámite burocrático, senón un protocolo clave para mellorar a coordinación policial e garantir unha maior protección ás vítimas de violencia de xénero.
Lugo, á cola de Galicia
Lugo é, a día de hoxe, a única gran cidade galega que aínda non forma parte deste programa, a pesar de que existiron dous acordos plenarios en 2019 e 2020 instando ao goberno local a dar este paso. “Foron seis anos de espera, seis anos nos que as vítimas de violencia machista en Lugo non contaron coa mellor coordinación posible entre administracións e Corpos de Seguridade do Estado”, destacan desde o Grupo Popular.
A adhesión debe ser inmediata e efectiva
Desde o Partido Popular de Lugo esixen que a firma da adhesión se produza canto antes e que se poñan en marcha todas as medidas necesarias para que a integración no sistema VioGén sexa efectiva. “Non pode quedar nun simple anuncio, como tantas outras promesas do PSOE e do BNG. Lugo necesita feitos, non titulares”.
Aurora Goás tamén lembra que o Concello ten todavía moito traballo pendente para amosar un verdadeiro compromiso coa Igualdade e contra da violencia de xénero, como dotar de persoal á Casa da Muller, que segue sen psicóloga nin asesora xurídica, cuestións básicas que a concelleira Angeles Novo ten que atender con urxencia, chámelles “papeliño” ou non.
