O Partido Popular insta ao goberno local a impulsar en colaboración coas administracións competentes a limpeza dos cauces e as beiras dos ríos dos parques periurbanos do Miño e o Rato.
A concelleira popular Ana López Pombo xunto co voceiro do PP Antonio Ameijide chequearon o estado no que se atopan estes cauces ao seu paso por Lugo e explicaron que “é lamentable que haxa moitos tramos nos que a maleza impide ata ver o río Miño, incluso a escasos dous metros do seu leito a única paisaxe que observamos son as malas herbas”.
A edil reclama unha actuación inmediata para mellorar a imaxe destas zonas de ocio “este plan de limpeza debe facerse canto antes non só pola estética tamén porque temos que protexer a flora e fauna e evitar acumulacións de lixo ou de sedimentos que logo provocan desbordamentos destes ríos causando destrozos nos paseos”.
A popular insiste en que os socialistas tamén teñen pendente a adquisición dos terreos situados na confluencia do Parque do Rato e o Paseo do Miño que presentan un estado selvático. “Xa transcorreu máis de tres anos do goberno de Lara Méndez e tampouco hai novidades”, concluíu.
