O Grupo Popular satisfeito polo respaldo unánime da corporación para conseguir unha bonificación dun 95% no IBI dos inmobles vinculados ás actividades agrícolas e gandeiras. O goberno local comprometeuse a incorporar esta proposta nas alegacións ás ordenanzas. Nos últimos días os populares explicaban aos veciños do rural a súa proposta.
No Pleno Extraordinario celebrado o pasado 14 de novembro se aprobou de forma inicial, diferentes ordenanzas fiscais, entre as que se atopa a número 203, Reguladora do Imposto sobre Bens Inmobles que contou cos votos a favor do PSOE, LUGONOVO e BNG, e que non contempla bonificacións para os inmobles vinculados ás actividades agrícolas e gandeiras da zona rural.
O PP presentará unha reclamación á devandita Ordenanza co obxectivo de establecer unha bonificación do 95% para estes inmobles e para elo, e conforme ca normativa vixente, é preciso que se acorde polo Pleno, declarar de especial interese ou utilidade municipal as actividades agrícolas e gandeiras.
Por todo elo o Grupo Municipal do Partido Popular considera de interese municipal que o Pleno da Corporación Municipal ACORDE:
De conformidade co artigo 74 apartado 2 quáter do Real Decreto Lexislativo 2/2004 polo que se aproba o texto refundido da Lei Reguladora de Facendas Locais, declarar de especial interese ou utilidade municipal as actividades agrícolas e gandeiras no municipio por concorrer circunstancias sociais, culturais e de fomento do emprego.
