O Grupo Municipal do Partido Popular acadou cos seus votos a reprobación de Daniel Piñeiro, concelleiro de Desenvolvemento Sostible e Persoal. Unha votación na que o PSOE votou en contra, mentres que o resto de formacións (Lugonovo, BNG, Cidadáns e Ace-Eu) optaron por absterse.
O concelleiro don Daniel Piñeiro Villares leva tres anos ao fronte da área de Desenvolvemento Sostible e Persoal, neste tempo a súa falta de xestión e ineficiencia provocou unha parálise na licitación dos contratos das súas áreas, o que supón un prexuízo aos intereses do Concello, tamén é o responsable da demora da sinatura do documento necesario para continuar cos trámites da Fábrica da Luz, co risco que iso supón, incluso expoñendo ao Concello a posibles indemnizacións millonarias tras a petición de rescisión do contrato polo adxudicatario.
Doutra banda, a política de persoal caracterizouse pola falta de diálogo, a confrontación e por medidas erróneas como o a creación dunha Dirección Xeral de Recursos Humanos que non cumpriu cos obxectivos fixados e derivou na renuncia da primeira titular deste órgano, todo elo, sen considerar as repercusións legais que pode ter o feito de que se manteña o devandito órgano cando hai un acordo plenario que o suprimiu.
O retraso nas concesións de licencias nestes anos foi a tónica habitual que ten un impacto evidente na actividade económica da cidade, e a zona pública de baño segue a ser unha promesa pola xestión nefasta para a súa creación, soamente hai que recordar que se chegou a desprazar a súa ubicación en máis de 800 metros sen decatarse dese grave erro, así como o de corrixir soamente unha das seis deficiencias comunicadas pola Xunta de Galicia.
Esta falta de xestión e os despropósitos do concelleiro de Desenvolmento Sostible e Persoal, víronse completadas cunha investigación xudicial por un presunto delito medioambiental polos vertidos fecais ao río Rato na Garaballa.
Por todo elo, o Grupo Municipal Popular que subscribe considera de interese municipal que o Pleno da Corporación Municipal ACORDE:
Reprobar ao concelleiro de Desenvolvemento Sostible e Persoal pola súa falta de xestión e ineficiencia nas súas responsabilidades no Concello de Lugo.
